Icône d'Elisabeth de la Trinité - Carmel de HarissaEwe Nyamuzinda wani, Busharhu bwimana mparamya, ontabale nciyibagire loshi, lyo nchiheba muli we, we buzibu na murhula nka kuly’omurhima gwani gwa nkalamire ensiku n’amango. Ojire nta kantu kankulage omurhula gwani, erhi ku nkula muli we, ewe w’erhahinduka, wenampeka kuli bwenene ngasi kasanzi omw’ihwe lyawe linene. Ohebe omurhula omu murhima gwani, ogujire Mpingu yawe, nyumpa yawe nkengwa na hantu h’irhamukiro lyawe. Ojire nta kulekaga mwo wenene, ci kone ntamale hô nyeshi nyeshi, mpindamuke omu buyemere bwani, nancirhule omu mukolo gwawe g’Obulemi.

Ewe Yesu muzigirwa, wababazibagwa buzigire burhuma, nalonza okuba muzigirwa wawe w’omurhima. Nalonza nkubwike n’irenge, nalonza nkusime… kuhik’okofa ! Ndi nayunva obuzamba bwani co cinarhumire nakuhuna nti « ocinyambike we », oshushanye omurhima gwani n’oborhere b’omurhima gwawe, onyubike, ontegeke, ocihindule muli nie, lyo akalamo kani kaba bumoleke bw’akalamo kawe. Oyishe muli nie nka Muhanyi, nka Mutuzi na nka Mucunguzi.

Ewe Luderho lw’ensiku n’amango, we Cinwa ca Nyamuzinda wani, nalonz’okugeza obuzine bwani omu kukuyunvirhiza, nalonz’okucijira mwiga, lyo nyig’ebikuyerekire byoshi. Omu bushugunu boshi, omu buzamba boshi, nalonza oku kusinza ensiku zoshi n’okubwarhala idako ly’obumoleke bwawe bukulu ; ewe Nyenyezi yani nzigirwa, ombulule bwenene ntahiraga nkahuluka ciru n’ehitya omu bumoleke bwawe.

Ewe Muliro guli gwasingonoka, Mûka g’obuzigire, « oyishe muli nie », ly’omu murhima gwani kuba nka kurhola omubiri gwa Luderho : na kandi mbe embere zage bunyamuntu bw’okunali, muli bo ajire buhyahya ihwe lyage lyoshi. Nawe we Larha, ololereze olunda eciremwa cawe cizamba ciri, « ocibwike n’ecihoho cawe », orhabonaga muli ye orhali « Muzigirwa wawe, mili ye wa hebire obuzigire bwawe bwoshi. »

Ewe ninyu mwe Busharhu bwimana bwani, mwe muli byoshi byani, iragi lyani, buhumba burhagwerhi buzinda, bunji bunakampeza, namacirhula emwinyu nka nterekero. Mucibishe muli nie lyo nani ncibisha muli mwe, omukulinda okucilola obumoleke bwinyu omu muhengere g’obukulu bwinyu.